• ७ मंसिर २०८३, आईतवार

बाढीले उजाडेका बस्तीमा गगन थापा, पीडितको घाउ सुन्न तीन जिल्ला दौडाहमा

नुवाकोट। भोटेकोसी बाढीले तहसनहस पारेका बस्ती र विस्थापित नागरिकको अवस्था बुझ्न नेपाली कांग्रेसका सभापति गगनकुमार थापा प्रभावित क्षेत्रमै पुगेका छन्। बाढीपीडितको पीडा, समस्या र गुनासा प्रत्यक्ष सुन्न उनी रसुवा, नुवाकोट र धादिङका प्रभावित बस्ती तथा होल्डिङ सेन्टरको स्थलगत भ्रमणमा निस्किएका हुन्।

टोखा–छहरे सडकमार्ग हुँदै नुवाकोटको बेत्रावती पुगेका थापाले त्यहाँ रसुवा र नुवाकोटका बाढी प्रभावित नागरिकसँग भेटघाट तथा अन्तरक्रिया गर्नेछन्। बाढीपछि उनीहरूले भोगिरहेका कठिनाइ, विस्थापनको अवस्था र तत्काल आवश्यक सहयोगबारे प्रत्यक्ष जानकारी लिने कार्यक्रम छ।

बेत्रावतीबाट उनी रसुवाको बोगटीटारस्थित होल्डिङ सेन्टर पुग्नेछन्। बाढीले घरबारबाट विस्थापित बनाएपछि अस्थायी आश्रयमा बसिरहेका नागरिकसँग संवाद गर्दै उनीहरूका समस्या र गुनासा सुन्नेछन्।

त्यसपछि नुवाकोट फर्किएर ढुंगे र त्रिशूली बजारका प्रभावितसँग भेटघाट गर्ने कार्यक्रम छ। विदुरमा बाढी प्रभावित सरोकार समितिका प्रतिनिधिसँग पनि छलफल हुनेछ।

थापाको भ्रमणको अर्को महत्वपूर्ण गन्तव्य विदुर नगरपालिका–५ स्थित पिपलटार हो। त्यहाँ रसुवा र नुवाकोटका प्रभावितलाई राखिएका पाँचवटा होल्डिङ सेन्टरको अवलोकन गरी आश्रित परिवारसँग प्रत्यक्ष संवाद गर्ने कार्यक्रम छ। नुवाकोटका प्रभावित क्षेत्रको भ्रमणपछि थापा देवीघाट हुँदै धादिङ पुग्नेछन्। धादिङको गल्छी र गजुरीमा बाढी प्रभावित नागरिकसँग भेटघाट तथा अन्तरक्रिया गरेपछि उनी गल्छीबाटै काठमाडौं फर्कनेछन्।

सभापति थापाको यो भ्रमणलाई बाढी प्रभावित नागरिकको अवस्था, राहत व्यवस्थापन र पुनःस्थापनाका चुनौती बुझ्ने स्थलगत पहलका रूपमा हेरिएको छ। उनको भ्रमणका क्रममा प्रभावितका आवाज र तत्काल सम्बोधन गर्नुपर्ने समस्याबारे प्रत्यक्ष छलफल हुने सचिवालयले जनाएको छ। रसुवा, नुवाकोट र धादिङका बाढी प्रभावित बस्ती तथा आश्रयस्थलसम्म पुगेर नागरिकसँग प्रत्यक्ष संवाद गर्ने कार्यक्रमअनुसार थापाले दिनभर विभिन्न स्थानको भ्रमण गर्नेछन्।