भदौ, १४ काठमाडौं । अविरल वर्षापछि खसेको पहिरोका कारण नागढुंगा–नौबिसे सडकखण्ड अवरुद्ध भएको छ। त्रिभुवन राजपथस्थित चिसापानी धारानजिक पहिरो जाँदा सडकखण्ड अवरुद्ध भएको महानगरीय प्रहरी वृत्त थानकोटका प्रमुख प्रहरी नायब उपरीक्षक मोहन खाँणले जानकारी दिए।
काठमाडौं उपत्यकाबाट नागढुंगा नाका हुँदै बाहिरिने र उपत्यका भित्रिने सवारी साधन लाइनमा बस्नु परेको छ। पहिरो पन्छाउनका लागि प्रहरीको टोली घटनास्थलसम्म पुगिसकेको खाँणले बताए।
सुरुङमार्ग निर्माण भइरहेको सिस्नेखोला नजिकै पनि राजमार्ग फराकिलो पार्ने क्रममा सडकमाथिबाट पहिरो खस्दा पटकपटक राजमार्ग अवरुद्ध हुँदा यात्रुले सास्ती खेपिरहेका छन् ।-
रासस