काठमाडौं : कांग्रेस सभापति शेरबहादुर देउवाले सबैको भावना समेट्ने गरी अघि बढ्ने बताएका छन्। शनिबार पार्टीमा निर्वाचित पदाधिकारी र केन्द्रीय सदस्यलाई प्रमाणपत्र वितरण कार्यक्रमलाई सम्बोधन गर्दै सभापति देउवाले पार्टीमा निष्पक्ष ढंगले काम गर्ने धारणा राखेका हुन्।
उनले भने, ‘भोट आफूलाई हाल्यो हालेन नभनी सबैको सभापति बन्छु। म सबैलाई समावेश गरेर सबैको सभापति बनेर, पार्टीमा सबैको भावना समेटेर हिँड्छु। ’ प्रधानमन्त्रीसमेत रहेका देउवाले आउने निर्वाचनमा देशको पहिलो पार्टी बनाउने गरी आफू लागि पर्ने उद्घोष गरे।
देउवाले भने, ‘कांग्रेस समावेशी पार्टी हो। सबैलाई मिलाएर लैजान्छौं।’उनले तल्लोतहबाटै कांग्रेसले महिला नेतृत्वलाई अगाडि बढाएको बताए। उनले काङ्ग्रेसमा जस्तो प्रजातान्त्रिक अभ्यास अरु पार्टीमा नभएकोसमेत दाबी गरे।
