• १६ फाल्गुन २०८०, बुधबार

म्यागङ गाउँपालिकाले एसईईमा उत्कृष्ट अंक ल्याउने विद्यार्थीहरुलाई नगद सहित पुरस्कृत गर्ने

नुवाकोटको म्यागङ गाउँपालिकाले माध्यमिक शिक्षा परीक्षा (एसईई) मा उत्कृष्ट अंक ल्याउने विद्यार्थीहरुलाई प्रोत्साहन स्वरुप नगद सहित पुरस्कृत गर्ने भएको छ ।
गाउँ कार्यपालिकाको गएको फागुन १८ गतेको वैठकले यस्तो निर्णय गरेको शिक्षा अधिकृत शेर सिंह रावतले जानकारी दिनुभएको छ । गाउँपालिका अन्तर्गतका विद्यालयहरुबाट शैक्षिक सत्र २०७९ को माध्यमिक शिक्षा परीक्षा (एसईई) मा सहभागी भई ४ जिपिए ल्याउने विद्यार्थीहरुलाई प्रति विद्यार्थी ५० हजार रुपैयाँ सहित पुरस्कार गर्ने निर्णय गरिएको शिक्षा अधिकृत रावतले जानकारी दिनुभएको छ ।
यस्तै ३ दशमलव ६ देखि ४ भन्दा कम जिपिए ल्याउने विद्यार्थीलाई २० हजार रुपैयाँ नगद सहित पुरस्कार प्रदान गर्ने निर्णय गाउँकार्य पालिकाकाले गरेको उहाँले बताउनुभएको छ । विशेष गरी विद्यार्थीहरु बिच पढाईमा प्रतिष्पर्धाको वातावरण सिर्जना गराउन र विद्यालयको समेत शैक्षिक स्थिति सुधार गर्न यस प्रोत्साहन कार्यक्रमले सहयोग पुग्ने अपेक्षा गरिएको छ । साथै उत्कृष्ट नतिजा ल्याउने विद्यालयहरुलाई समेत प्रोत्साहन गर्ने कार्यक्रम रहेको शिक्षा अधिकृत रावतले जानकारी दिनुभएको छ ।
यस शैक्षिक सत्रमा म्यागङ गाउँपालिकाको विभिन्न ७ वटा विद्यालयबाट २ सय २९ जना माध्यमिक शिक्षा परीक्षा (एसईई) मा सहभागी हुदैछन् । यहि चैत १७ गतेदेखि माध्यमिक शिक्षा परीक्षा (एसईई) २०७९ सञ्चालन गर्नको लागि राष्ट्रिय परीक्षा बोर्डले तयारीलाई तिब्रता दिइरहेको छ । परिक्षा चैत १७ गतेदेखि चैत २९ गतेसम्म सञ्चालन गर्ने कार्यतालिका रहेको छ ।





प्रतिक्रिया दिनुहोस्