नुवाकोट: इलाका प्रहरी कार्यालय टिकापुरका प्रमुख (डिएसपी) उद्धवसिंह भाटको शनिवार सरुवा भएको छ । भने प्रहरी प्रधान कार्यालयको मानवस्रोत विकास विभागका अनुसार इलाका प्रहरी कार्यालय टिकापुर प्रमुखको रुपमा डिएपी तुलसीराम अर्याललाई पठाइएको छ ।
रेशम चौधरी जेलमुक्त भएको खुसीयालीमा स्वागत गर्न पुगेका उनलाई नेपाल प्रहरी विशेष सुरक्षा गण सुनवल सरुवा गरिएको हो ।
डिएसपी भाट टीकापुर हत्याकाण्डमा दोषी ठहर भई जन्मकैदको सजाय भोगिरहेको अवस्थामा यही जेठ १५ गते गणतन्त्र दिवसको अवसरमा राष्ट्रपतिबाट आममाफी पाएका चौधरीलाई स्वागत गर्न पुगेपछि विवादित बनेका थिए । रेशम गाडिबाट ओर्लिने क्रममा हतार हतार गरेर खादा लिएर सार्वजनिक कार्यक्रमै बधाई दिएपछि उनी विवादमा तानिएका थिए ।
उनको चर्को आलोचना भएको थियो । प्रहरीका उच्च अधिकारीलाई हत्या गरेको आरोप लागेका रेशमलाई नै डिएसपी भाट खादासहित स्वागत गर्न पुगेको भिडियोसमेत भाईरल छ । तर डिएसपी भाटले सामान्य शिष्टाचार र औपचारिकता मात्रै निभाएको भिडियोलाई अन्यथा प्रचार गरी बदनाम गराउन खोजिएको बताएका छन् ।यस्तै प्रहरी प्रधान कार्यालयले डिएसपी रविन्द्रमान गुरुङको पनि शनिवार सरुवा गरेको छ । उनलाई प्रहरी वृत्त सिंहदरबारमा पठाइएको छ ।