नुवाकोट, २०८२ असार २० जिल्ला नुवाकोटको दुप्चेश्वर गाउँपालिका–७ कुटुङखोलाका २६ वर्षीय नोनो शेर्पा तादी खोलामा पौडी खेल्ने क्रममा बेपत्ता भएको १७ दिनपछि मृत अवस्थामा फेला परेका छन्।
गत असार ३ गते दिउँसो करिब ११:४५ बजे खोलामा पौडी खेल्दा शेर्पा खोलाले बगाएका थिए। सोही क्रममा उनी बेपत्ता भएका थिए। निरन्तर खोजी कार्य जारी रहँदा असार २० गते बिहान करिब १०:३० बजे दुप्चेश्वर गाउँपालिका–६ टटलेस्थित तादी खोलाको बगरमा उनको शव सडेको र गलेको अवस्थामा फेला परेको हो।
जिल्ला प्रहरी कार्यालय नुवाकोटले दिएको जानकारीअनुसार, प्रहरी अधिकृतसहितको टोली घटनास्थलमा खटिई लाशको प्रकृति मुचुल्का तयार गर्नुका साथै प्रारम्भिक अनुसन्धानको कार्य सम्पन्न गरेको छ। शवलाई पोस्टमार्टमका लागि त्रिशुली अस्पताल लगिएको र घटनासम्बन्धमा थप अनुसन्धान भइरहेको प्रहरीले जनाएको छ ।