दीपावली पर्वको अवसर पारेर नुवाकोटको किस्पाङ गाउँपालिका–२ स्थित ताजीमा पाँचौँ संस्करणको ताजी कप २०८३ फुटबल प्रतियोगिता भव्य समारोहका बीच उद्घाटन गरिएको छ।
ताजी तामाङ एकता समाज नेपालको आयोजनामा सुरु भएको प्रतियोगिताको उद्घाटन किस्पाङ गाउँपालिका–२ का वडा अध्यक्ष बद्रीप्रसाद देवकोटाले प्रमुख अतिथिका रूपमा गर्नुभएको हो।
उद्घाटन समारोहलाई सम्बोधन गर्दै वडा अध्यक्ष देवकोटाले खेलकुद केवल मनोरञ्जनको माध्यम मात्र नभई स्वस्थ, अनुशासित र सक्षम समाज निर्माणको महत्वपूर्ण आधार भएको बताउनुभयो। उहाँले स्थानीय युवाको खेल प्रतिभा प्रस्फुटन, शारीरिक व्यायाम तथा खेलकुद गतिविधिको प्रवर्द्धनका लागि वडा कार्यालय सधैँ सकारात्मक रहेको उल्लेख गर्दै खेलकुद क्षेत्रको विकासका लागि आवश्यक सहयोग गर्न वडा प्रतिबद्ध रहेको बताउनुभयो।
ताजीको खेलमैदानबाट भविष्यमा राष्ट्रियस्तरका खेलाडी उत्पादन हुन सक्ने विश्वास व्यक्त गर्दै उहाँले स्थानीय स्तरमा आयोजना हुने यस्ता प्रतियोगिताले युवालाई सकारात्मक गतिविधिमा जोड्नुका साथै आपसी सद्भाव, एकता र भाइचारालाई थप मजबुत बनाउने धारणा राख्नुभयो।
त्यसैगरी, ताजी युवा क्लबका अध्यक्ष शेरबहादुर तामाङ (तामिल) लगायत स्थानीय खेलप्रेमी तथा सरोकारवालाहरूको सहभागितामा सम्पन्न उद्घाटन समारोहले स्थानीय खेलकुद गतिविधिलाई थप चलायमान बनाउने अपेक्षा गरिएको छ।
स्थानीय युवाको खेल प्रतिभा पहिचान, फुटबल खेलको विकास तथा सामाजिक एकता अभिवृद्धि गर्ने उद्देश्यले आयोजना गरिएको पाँचौँ ताजी कपले यस क्षेत्रको खेलकुद गतिविधिमा महत्वपूर्ण योगदान पुर्याउने विश्वास आयोजकले लिएको छ।
प्रतियोगितामा सहभागी सम्पूर्ण टोलीलाई खेलभावना, अनुशासन र उत्कृष्ट प्रदर्शनका साथ प्रतिस्पर्धा गर्न आयोजकले आग्रह गरेको छ।
