नुवाकोट । स्थानीय खेलकुदको विकास र युवा प्रतिभाको प्रवर्द्धनलाई प्राथमिकता दिँदै किस्पाङ गाउँपालिका–२ का वडा अध्यक्ष बद्रीप्रसाद देवकोटा र ताजी युवा क्लबका अध्यक्ष शेरबहादुर तामाङ (तामिल) बीच सहकार्यको प्रतिबद्धता व्यक्त भएको छ।
शुभ दीपावलीको अवसरमा ताजी तामाङ एकता समाज नेपालको आयोजनामा सुरु भएको पाँचौँ ताजी कप २०८३ फुटबल प्रतियोगिताको उद्घाटन समारोहमा वडा अध्यक्ष देवकोटाले खेलकुद क्षेत्रको समग्र विकासका लागि वडा कार्यालयको पूर्ण सहयोग रहने प्रतिबद्धता जनाउनुभएको हो।
प्रतियोगिताको प्रमुख अतिथिका रूपमा उद्घाटन गर्दै अध्यक्ष देवकोटाले खेलकुदलाई मनोरञ्जनमा मात्र सीमित नराखी युवाको शारीरिक तथा मानसिक स्वास्थ्य, अनुशासन, नेतृत्व क्षमता र सामाजिक एकता विकासको महत्वपूर्ण माध्यमका रूपमा अघि बढाउनुपर्ने बताउनुभयो।
उहाँले ताजी क्षेत्रमा खेलकुद गतिविधि विस्तार गर्न, युवालाई नियमित शारीरिक व्यायाम तथा खेलकुदमा प्रोत्साहित गर्न र स्थानीय प्रतिभालाई अवसर प्रदान गर्न क्लब तथा वडाबीच सहकार्य आवश्यक रहेको उल्लेख गर्नुभयो। खेलकुद विकासका लागि आवश्यक गतिविधिमा वडा कार्यालयले सक्दो सम्पूर्ण सहयोग गर्ने उहाँको भनाइ थियो।
ताजी युवा क्लबका अध्यक्ष शेरबहादुर तामाङ (तामिल) को नेतृत्वमा स्थानीय युवाहरूले खेलकुद क्षेत्रलाई सक्रिय बनाउने प्रयास गरिरहेका बेला वडा अध्यक्ष देवकोटाको प्रतिबद्धतालाई स्थानीय खेलकुद विकासका लागि महत्वपूर्ण सहयोगका रूपमा हेरिएको छ।
पाँचौँ संस्करणसम्म आइपुगेको ताजी कपले स्थानीय युवाको खेल प्रतिभा पहिचान, खेलाडी उत्पादन र सामाजिक सद्भाव अभिवृद्धिमा महत्वपूर्ण भूमिका खेल्ने अपेक्षा गरिएको छ।
स्थानीय तह र युवा क्लबबीचको सहकार्यलाई थप प्रभावकारी बनाउँदै ताजीलाई खेलकुदको पहिचान दिलाउने लक्ष्यसहित प्रतियोगिता सञ्चालन गरिएको आयोजकले जनाएको छ।
